Tourism of '' GILGIT BALTISTAN ''

فطرتی طور پر انسان جب بھی کسی علاقے میں کسی کام یا سیاحت کی غرض سے جاتا ہے تو اس کی کوشش ہوتی ہے کہ اس علاقے کے متعلق اور مقامی لوگوں کی تہذیب و تمدن، تاریخ، رہن سہن اور ثقافت کے متعلق جان سکے ـ بالکل ویسے ہی وہاں کے مقامی لوگ بھی باہر سے آئے انسان کے متعلق تجسس رکھتے ہیں ـ اور وہ جاننا چاہتے ہوتے ہیں کہ آپ کی روایات، زندگی گزارنے کے طور طریقے اور اخلاقیات کیا ہیں ـ اپنے متعلق کسی کو کچھ بتانے کا سب سے مؤثر طریقہ اپنے ” عمل اور کردار ” سے بتانا ہے اور سب سے غیر مؤثر طریقہ اپنے متعلق زبانی کلامی یہ  بتانے کا ہے ـ کہ ہم اعلیٰ تعلعم یافتہ، صفائی پسند، اور بہترین معاشرتی روایات سے آرستہ لوگ ہیں ـ دراصل سب مسائل اسی جگہ سے شروع ہوتے ہیں ـ!ـ

سیاحتی اخلاقیات پر بات سے پہلے ہم مقامی لوگوں کی اخلاقیات پہ روشنی ڈال لیتے ہیں ـ

 مقامی لوگ ـ

گلگت بلتستان کے لوگ جہاں قدرتی انسانی خوبصورتی سے مالامال ہیں ـ وہیں یہ لوگ بے انتہا خوش اخلاقی، مہمان نوازی، محنتی، صفائی پسندے اور غیرت مندی کے عناصر سے بھرپور ہیں ـ اور ان کی یہ صفات مقامی لوگوں کے ساتھ ساتھ باہر سے آئے لوگوں کیلئے بھی یکساں میسر ہوتی ہیں ـ جہاں تک ممکن ہو سکے وہ سب کا خیال رکھتے ہیں ـ لیکن بدلے میں ہم انہیں کیا دے کر آتے ہیں ذرا اس موضوع پر بھی بات ہو جائے ـ!ـ

نیچے دئیے گئے پوائنٹس کو غور سے پڑھیں اور اپنے خیالات سے بھی ضرور آگاہ کریں کہ بطور مہمان یہ سب کام کرنا کسی کہ زیب دیتا ہے  ـ اور یہ سب میرے ذاتی خیالات نہیں بلکہ گلگت بلتستان کے مقامی لوگوں کی دبی آواز میں شکایات ہیں ـ!ـ

صفائی ستھرائی کا خیال نہ رکھنا ـ!ـ

جہاں مقامی لوگ صفائی ستھرائی کا نمونہ ہیں وہیں سیاح جب کسی مقام کی سیر کر کے وہاں سے چلے جاتے ہیں تو وہ سیاحتی مقام سیاحوں کی پھیلائی گندگی کی وجہ سے ان کی بدنظمی، ذہنی پستی اور حکومتی نااہلی پہ روتا ہوا نظر آتا ہے  ـ کیونکہ وہاں صرف خالی بوتلیں، شاپر بیگ، سگریٹ اور کچرہ ہی نظر آتا ہے

قدرتی ماحول کو نقصان پہنچانا ـ!ـ

مقامی لوگوں کیلئے سیاحوں کا ایک تحفہ یہ بھی ہے کہ وال چاکنگ کرنا، کھلی جگہوں پہ واش روم کر دینا، جنگلی حیات کہ نقصان پہنچانا، درختوں کی ٹہنیوں اور پھولوں کو توڑنا، جھیلوں اور دریا کنارے پڑے پتھروں کو پانی میں پھینک دینا اور بے شمار اس قسم کی حرکات کرنا کہ جس سے قدرتی ماحول کا بے پناہ نقصان ہو رہا ہے ـ!ـ

بغیر اجازت گھروں اور باغات میں جانا ـ!ـ

سیاحوں کو یہ بات اچھے طریقے سے جان لینی چاہئے کہ سیاحتی مقامات اور رہائشی علاقوں میں فرق ہوتا ہے لہٰذا رہائشی جگہوں پہ بغیر ضرورت اور بلا اجازت ہرگز نہ جائیں تا کہ چادر اور چاردیواری کا تقدس پامال نا ہو ـ اور اسی طرح مقامی باغات میں بغیر اجازت کے داخل ہو جانا، وہاں سے پھل کھانا اور وہ بھی ٹہنیوں سمیت توڑ کر،  بالکل غیر اخلاقی حرکت ہے ـ یہ ان کی پوری سال کی محنت کی کمائی ہوتی ہے ـ آپ گلگت بلتستان کے علاوہ پاکستان کے کسی بھی حصے یا دنیا کے کسی دوسرے ملک میں جا کر اس حرکت کو دہرا کر دیکھیں اور پھر اس عمل کے سخت ردعمل کا مظاہرہ کر کے جائیں گے ـ مقامی لوگوں کے صبر کا اس حد تک امتحان لینا کسی طور ٹھیک نہیں ـ  لہٰذا خود بھی اجتناب کریں اور کسی کو ایسی گھٹیا حرکت کرتے ہوئے دیکھیں تو اپنا فرض سمجھ کر ممکنہ حد تک اس کو منع کرنے کی کوشش کریں ـ!ـ

مقامی لوگوں کی روائتی مہمان نوازی ـ!ـ

مہمان نوازی گلگت بلتستان کے لوگوں کا زیور ہے اسی وجہ سے وہ سیاحوں سے بالخصوص غیر ملکی سیاحوں سے کسی بھی چیز کی قیمت لینے سے منع کر دیتے ہیں لیکن سوچا جائے تو اس مقامی شخص نے بھی اپنے خاندان یا کنبے کی کفالت کرنی ہوتی ہے ـ ان کے ایک بار منع کرنے پر پیچھے ہٹ جانا کسی طور مناسب نہیں ـ اپنی طرف سے سو فیصد کوشش کریں کہ ان کو سامان کے پیسے دیں ـ
اپنے پاس بیگ میں مختلف قسم کے تحائف ضرور رکھیں تا کہ اگر کسی جگہ آپ کو ایسا محسوس ہو کہ پیسے دینے پہ زیادہ زور دینے سے مقامی شخص کے جذبات متاثر ہو سکتے ہیں تو آپ اس شخص کو اپنی طرف سے کوئی تحفہ دے دیں ـ!ـ